جورجكو وإمّو

[fouadzadieke]

جورجكو وإمّو

- ورّك وا جورجكو! أكون أ?يس منّك هكا أخلّيلكي.. وبسْ تجي المسا علبيتْ إنت تتري, هكا ما أطيلعك من جلد وأحطّك فجلدلخ .. أنا لا أكون من ظهر أبوي!

- زحك الإبن على إمّو, وعدي صوب رفقاتو شيصلنْ قبل ما يروحوا, وهوّه ما لهو هايه من بايه فلكه.

- صار المسا وجورجكو الأفندي جا عالبيت بعدل ما خلّص لعبو مع رفقاتو.. نسي شي الإمّو قالتلو.. وقال بلكي كا تسه حنك معو.

- وصلت الوصلْ عالبيت كنْ حظّرت الإمّ روحا.. وهيّه كو تسكسك ضراصا عليو.. قامت ظبطتو وشدّتو من إيديو وسقاتو.. وقالتلو هلكرّة يكفيك الشّددان.. وكرة التجي غير تدويغ مو دوّغك!

- راح نصّ ساعة زمن فالحاله .. ساعة الإمّ فادا شاط علإبنا .. قامت راحت فلّتتو. وجابت أكل حطّت قدّامو .. وقالتلو ده قوم كلْ.

- بلّش كياكل قامت صارت تقولّلو: يا إبني عيبو تشتم شنسوان الحارة.. هتكتني بيناتن .. أستحي أطلع برّة من مستحاتي منّن سوّدتْ و?ّي قدّامن .. كلّتن كيسووا ?ازنات منّي.. وكيقولون ما تقتي تربّي إبنكي! إلى أيمت تتظبطلك شويّة عقل وتفكّ من هويا لشتومات .. مو مليح أبد تشتم يا إبني .. بعدين ألله ميحبّك!

- خطيّة الولد كان شويّه هبلّوك وعقلو ناقص.. إمّو كا تحكي من هون هوّي كان يطيلع من هون. الأم فادا كيشوط عليو .. بس كا تنقحر بين العالم بوش كا تستحي من شتمويات إبنا هوك البعروق و مزنجرين .. احتارت ته أش تتسه.. قامت حملتْ روحا فيوم من ليّيم وراحت عند عمّو سيسو ايليّا ألله يرحمو (كيسي نفشتوكات هوّي والمرحوم يعقوب صارة والمرحوم كوركيس جرديكا والمرحومة عزّكة).

- الإمّه قالت شسيسو ايليّا عمّي أبو عبّود: طلّع ألله يرحم ميتينك به موتسه ?ارة شي شزّا الولد.

- سيسو ايليّا قالاّ: إختي (فظيلة) أشني قصّة إبنكي؟

- قالتلو حال المسله زيا يه .. بوش يشتم شنسوان الحارة .. ما بق أتيق أطلع برّة.. ولمّا أطلع برّة أكب راصي قدّامي وأمشي .. شلا أري نيس!

- اي إختي إمّ (جورج) ليكو تسويلكي غمّ .. يقني شغلتو سهله يه .. وإبنك فقوّة الله والمسيح يومين ساسه تيسير كما شلف الزّهب. وقام طيلع وحده من هوك جزجزّوكات الكا عندو وطيلع كاغده وكتب عليا كم كلمه وطوها كويّس وعطها يه وقالاّ: طلعي إختي فظيلة بس تصلين البيت خيطي بيتونكه زغيرة شزيا النفشتوكه وحطّيا جوّاتا .. وقبل ما ينام حطّيا تحت راصو .. وفالصّباح ?اخل يقوم من النّوم علقيا فرقبتو تحت ?ن?و وليكو تظيع ولا يشلحا .. ته تبقى معو علطول فهمتي؟

- أي .. أي فهمتو!

- تسوين شي الأقولكي عليو فيوم يومين إبنكي تيسير كما شلف زهب .. وتتقولين هاك الإبن راح وجا ويحدلخ أصارو. قالتلو: وي ألله يسمع منّك يا ربّ. وألله يخلّي اولادك عمّي أبو عبّود.

راحت فظيلة عالبيت وسوت تمام كما القالاّ عمّو سيسو .. يومين ساسه فاتوا فالحالة أرت إبنا كما الكوصار أخير .. قامت راحت تاني يوم عند عمّو سيسو وقالتلو: عمّو دخيلك بلكي شويّه تخفّف قوّة النفشتوكه بوش كي قويّة إبني ما بق يطلع برّة .. قام سوالا وحدتلخ .. والإبن الحمد لله صار أخير .. ويجا يا هيّي ?يا كو تحسّ .. يا فعلا كوصار أخير .. بس أنا مويقّن ف?يا مسلوكات .. ومو تيق أقول ته إبنا طاب وغلاّ ما طاب. إلى هلّست كيكو نيس فبلادنا يئمنون فهويا الشيّات .. أنا أقول هايه تخالف إرادة ألله لأنّو من الشيّطاني .. وأنا مونصح واحد يودّي إبنو والاّ يروح عند شيخ والاّ غيرو .. كلّن ?زوباتن!