ديرك أيّام زمان شعر عامّي فؤاد زاديكه ديرِكْ مو تروح مِنْ بالي ... و إلى أمْسِكْ ك

[fouadzadieke]

ديرك أيّام زمان

شعر عامّي

فؤاد زاديكه

ديرِكْ مو تروح مِنْ بالي ... و إلى أمْسِكْ كوپالي

مِنْ زِغري عِشتو فيا ... تاني (آزخ) تِحلالي

----

بِقْچِتْ (لَوزِه) و اللّكرومْ ... و الكازيِّه و اللّچمومْ

و القِشْلَة الفْرَنساوي ... صِرتو مِنْ قَحري مَحمومْ

---

حارة بحارة كَتْزَكَّرْ ... و شارعْ بيت (حنّا الأشْقَرْ)

كِنْ قِدّا عيني هَلّا ... بوشْ كوَيِّسْ كَتْصَوَّر

---

(حَنّا الأعْرَجْ) كا شِقّاعْ ... و (صَلْبونِكْ) إرقاعْ ارقاعْ

چَاخِلْ كِنّا اوُلادْ زغارْ ... كا نِلبِسْ جَزماتْ وُساعْ

---

دِكّانِتْ (گَبرو الصِّفَّارْ) ... كِنّا نشوفَا كِلّْ نهارْ

و قَحوِتْ (رازاي) فالسّوقْ ... و بِقبالَا (حنّا المِنْگارْ)

---

بيت (ملكي زيرّو) فالچّولْ ... كا نِلْعَبْ وِ نْدَخِّلْ گولْ

كَرّا جَوّاتِ اللّصفوفْ... سِينا جام الغُرفِه خولْ

---

مِنْ حارِتْ (فَتحو) و (مَرقوزْ) ... كا نِسْمَعْ صوتِ النّاقوزْ

(گَبرو زاديكِه) كَيبيعْ ... بُوزْ و خَرطَة و الگازوزْ

---

پُوصْطِتْ (جورج رِسْقو) الرّادوحْ ... عالقامشلي كانْ تروحْ

كا بِدّا شي نِصّ نهارْ ... لَتْوَصِّلْ بِطْلوعْ الرّوحْ

---

(يعقوب) و (دِنحو الفِرّانْ) ... كانوا شِرْكِه فِالدِّكَّانْ

إيلَا كا ناخِزْ لِخْبَيزْ ... مِنْ فِرْنِنْ كَيصيرْ فَرمانْ

---

(مَارشمُوني) و النّاقوزْ ... (حنّا رَشكو) و (قِرْياقوزْ)

و (حَنّا القَسّ) و (قَسْ گَبرو) ... فِلْبيعَة يصيروا گَالُوزْ

---

خَالِه (جازيَة) المَشهورة ... بالتّوليد و مَمْهورة

و (فَرْحَة كَكِّه) فالتّمريضْ ... كانتْ مِتْلِلْ دَكتورَة

---

(مَلكِه حَبّو) عَم إمّي ... راصْ المَزْحَة كَيْحَمّي

كِلْ نِكتِه و أخْرَبْ مِلَّخْ ... يا ألله تِرْحَمْ عَمّي

---

بيت (عَورِه) و (لَمْپَة) جيرانْ ... و بيت (حَدوكِه) يا إخوانْ

كا فِي بيناتِنْ شارِعْ ... كِلْ يَومْ معَبّا نِسوانْ

---

(قِريو لَچِّه) و (الشّاپورْ) ... ما شالله مِتْلِلْ ناجورْ

كانوا جيرانْ و رِفْقَا ... تقولْ بَلكي قَسّ و صاعورْ

---

صوت مجَنجَلْ مِنْ (سعيدْ) ... الأعمي في كِلْ ليلِت عيدْ

أطْيَبْ مِنْ حِسُّو ما كانْ ... لا مِنْ قِبلْ و لا شي جديدْ

---

موقع بيت (لحدو نعمانْ) ... إستراتيجي مِتْلِلْ كانْ

كِنّا نِتْمَشْوَرْ عِندو ... (عيسى) و (فؤاد) و (بِهنان)

---

(مِرْيَمْ إم صامو گَورو) ... بِنت (قَسّ گَبرو) ما غيرو

كانتْ قُرمِه المرحومِه ... و (قَس گَبرو) أسْبَتْ دَورو

---

(حنّا بَحْدِكِه) القِصّابْ ... و (چُوكِه) الصيّاد الحِبّابْ

(شِكرو پَشكِه) و دِكّانو ... و (عامو) كَيبيعِلْ قِپقابْ

---

(مريم زيرو) الجبّارَة ... قَبْلِلْ صارتْ خِتيارَة

كانِتْ بَرْبَرْ عَشْر رجاِل ... و كانتْ مختار الحارَة

---

رِحتُو عند عَمّو (إيشوعْ) ... أشتري چايِه بِرْبوعْ

(ايليّا) جيرانو كانْ ... و بيت (مِشْطِه) فوقو بِطْلوعْ

---

بيت (گَلعو) و (يعقوب صارَة) ... و (موسى آدو) فِالحارَة

و جَنبو (سليمان الشِّمَّاسْ) ... و بيت (هيلانِه) يا خسارَة

---

(مِيخا دورِه) و مَزْقاتو ... تِجْ لِمبالي و مَزْحاتو

أشْ مَوتِه پيسِه ماتَا ... عَبّتْ قلبي حَصْرَاتو

---

(مَكونو بِرْهِي زَلَّطْ) ... الطّيبوناهي خَلَّطْ

بس كَرّة وِاحدِ أزْكِرْ ... فالتّخليطَة كِنْ غَلَّطْ

---

(حنّا الدّيشجي) قُلْ مِ الرّاصْ ... كَيْرَكِّبْ تاخِمْ لِضْراصْ

و (حنّا چَلتوك) مجَبِّرْ ... ما كا نِطْلَعْ مَعو راصْ

---

كِلْ شي ما بَقْ مِنّو شي ... لا تابوتي و لا نُعشي

حارات الكِنّا نِعْرِفْ ... دَوَّرناها كا نِمشي

---

أشقَد ما واِحدنا يقولْ ... تَنسى مبارِح عِرظْ و طُولْ

مو مِمْكِنْ يقْدَر ينسى ... لازِم يتْزَكَّرْ عَطّولْ

---

كِلْ زابوق و كِلْ حارَة ... و إلى هاك المِنّارَة

عِنْدِ الجاِمع كا إلنا ... مَشوِه و زِحْكِه و دوبارَة

---

هايِه حَكّويتْ ديرِكْ ... مِي قِصِّتْ (جورِه مَرِّكْ)

(عَمسو) و (چاچو) و (عَزِّكِه) ... و (جِرْديكَا) و (يوسِفْ پِرِّكْ).