أستاذي الفاضل فؤاد
أنا كمان أحترم رأيك وكتاباتك جدا جدا وأشكرك على كل موضوع تكتبو أو كلمة حق تقولا وصدق أنو كتير ناس تقرالك وتحب كتاباتك وتريد كتير تشترك معكن وتكتب فالموقع بس لأنو مساحة الحرية عندك كبيرة وتعطي مجال لعلو وجلو فهادا الشي من ناحية تشوفو أنتا ايجابي بس بنفس الوقت ضر بالموقع لأنو خلا ناس كتير تبتعد عن الكتابة فيو وتكتفي بالقراية من بعيد ... خليني أكون صريح معك واتمنى تقبل صراحتي وصدقني هادا فكر كتير نيس فديريك وغير ديريك ... يقلك موقع فؤاد زاديكة أي موقع كويس وفيو مواضيع حلوة بس بين كل موضوع وموضوع تشوف حكي فالسياسة ومن النوع اللي تنشروا مواقع للمعارضة السورية وكتير ناس ياعزيزي استاذ فؤاد تقلك ابعد عن الشر وغنيلو وأش بدي بهالحكي اللي بالفعل لا بيقدم ولا بيأخر وخصوصا بموقعك اللي اتصور لو يكون ألو هوية خاصة أحسن يعني موقع فؤاد زاديكة موقع اجتماعي ثقافي يهتم بالأمور اللي تهم أهل ديريك والأزخينية ومنطقة الجزيرة موقع متخصص ويركز بناحية معينة مو أحسن ما يخلط من هون وهون وشي لازم وشي مو لازم ....
ارجع أقل لاتواخزني هادا موقعك وأنت حر .... بس مو غلط أبدا يكون موقع على الأنترنت ألو هدف محدد ومتخصص منشان يكون التركيز أفضل والفائدة أكتر .
يعني يا استاذ فؤاد أنت مبدع فمجال الأدب والشعر واللي تكتبو بهالمجال رائع والكل يحبوا بس لما تكتب بالسياسة مو كل الناس رح تتفق معك وهادا الشي رح يأثر على مواضيعك الأدبية لأنو عم تنشرا بنفس الموقع .
أستاذ فؤاد ... في كتير مواقع سياسة ومتخصصة ومواقع للنقد السياسي والضرب بالحكومات والمجال مفتوح وتقدر الناس تقرا هادا الشي عندك ولا عند غيرك وكمان كل الناس اللي تريد تقدر تنشر بيانات ومواضيع بهالمواقع السياسية .... فليش عندك كمان ؟
أنا أسف كتير مابدي ابين كأنو عم اتتدخل فشغلات تخصك بس اعتبرهو رأي من أنسان يحبك ويحب كتاباتك .
السيد رئيف أرجع وأقول أنا أحترمو ولا تعتبر كلامي تجريح بشخصو أبدا بس لأنو هو اللي نشر البيان لازم يتحمل ردود الأفعال عليو .
السيد رئيف يا استاذ فؤاد عم يكتب باسم حزب وهالحزب عندو موقع وجريدة وامكانية يحكي عالتلفزيونات كمان .... اذن خلي يروح ينشر بياناتو هونيك أما أنو يجي ينشر هيك بيانات أو حدا يكتب مواضيع من هيك نوع بالموقع عندك ياأستاذ فؤاد فغير أنو يضر بأهل ديريك اللي ما دخلن بهيك حكي وهادا الشي شرحتولك هو ..... كمان يا استاذ فؤاد ماتشوف معي أنو ينفر الناس من أنو تشترك فموقعك أو حتى المشتركين معك مارح يقولوا لحالن عيفك من هيك حكي وبلالي وجع الراس ولاحظ معي يا أستاذنا الكبير أنو في مشتركين عندك يحبو يكتبو بالمواضيع الاجتماعية والأدبية والدينية والسيد رئيف وغيرو مافي غير كل ما دق الكوز بالجرة على نشر بيانات سياسية تنفر هالمشتركين المخلصين اللي كل همن الكلمة المفيدة والتواصل البناء ..... وارجع وأقولك اللي بدو سياسة الأنترنت فيو أشكال وألوان .
هلا يمكن تقلي لازم شعبنا كمان يتجرأ ويحكي وينشر ويعبر عن رأيو وأنا معك بس هيك مواضيع ألها مكان أنسب ووقت أنسب ...... وهلا نرجع على مشكلة ديريك :
بديرك يا استاذ فؤاد ويا حضرات الاخوة والاخوات تشكلت لجنة من كل الطوائف المسيحية وباشرت بتهدية الوضع وحلحلة المشكلة بأسلوب الحكمة والتفاهم وعلى مبدأ الأرض تسع للجميع وردنا ولا ما ردنا نحنا جيران وعايشين ببلد واحد ورح نبقى وأي كلام غير هاد مرفوض أو ضرب بالدولة مابيفيد أبدا أبدا .... والمغتربين الله يعطين ألف عافية دائما يساعدوا بالخير ومو يقصروا ومتل ما ينطلب منن من ديريك واللجنة اللي تشكلت فيا عم يقدموا ...... بس لما يجي كم واحد مغترب ويسير يفسر الأمور على كيفو وبدون ماحدا يطلب منو يعطي صورة وكأنو أهل ديريك صاروا القوات اللبنانية وأنو المسيحيين فديريك ضد الدولة فما بعرف هادا يفيد مين ... ؟ مين ... ؟
متل ما سمعنا صار اجتماعات للمغتربين وحضرتك يا استاذ فؤاد يمكن حضرت واحد منن لأنك انسان ألك وزنك وموقعك اللي كل الناس تحترمو ..... فأسألك يا استاذ فؤاد في حدا من المغتربين عطى وكالة للسيد رئيف أو لغيرو يكتب هيك بيانات أو حدا من المغتربين كلف شورايا ولا مورايا تنشر بيانات عن الوضع بديرك .... يكتبوا .... يكتبوا .... وينشروا ..... ينشروا .... أحرار بس بمواقعن وجرايدن مو بموقع ألو شعبيتو والناس كلا تحبو وتحب صاحبو وتتمنالو كل الخير بس بهالطريقة رح تاخد على خاطرا منو لانو منشان حرية رأي فلان من الناس نضر بحرية ونشوه صورة آلاف الناس .
قلبنا معك يا أستاذ فؤاد منشان التهديدات اللي ذكرتا والله يحميك النا لتبقى الاديب والشاعر الكبير اللي تحبو ديريك وهو كمان أكيد يحبا و منشان مصلحتا بهادا الظرف الراهن ما رح يسمح أنو موقعو باسم حرية الرأي يتحول لخنجر فخاصرتا .
تحياتي أستاذ فؤاد وأنا اقبل منك كل رأي واعتذر عن كل كلمة تجاوزتو فيها المسموح بس المحبة والحرص يشفعولي عندك .
|