“ويلكم إذا نفذ صبره!”

[fouadzadieke]

الجيش السوري الالكتروني المنشق
اليوم وأنا عم أعمل جولة بعالم المنحبكجية لفت نظري صورة … متل مو شايفين إنو الصورة لماهر الأسد ومكتوب تحتها “ويلكم إذا نفذ صبره!”

وطبعاً في كتير تعليقات عليها متل لإيمتى بدو يضل صابر؟ … ومشان الله خلي صبرو ينفذ … بدنا ينفذ ويسحق هالخونة … ومن هالحكي الحقود

يلي اخترع هالجملة وصمم هالصورة وحطها عالفيسبوك هو شخص سوري, وفي سوريين كتير بفكر...و بهالطريقة … بس السؤال هو لمين عم يقول ويلكم إذا نفذ صبره؟؟ .. أكيد ما عم يحكي مع أمريكا وإسرائيل لأنو الفرقة الرابعة تهتم بالشؤون المحلية, وأكيد ما بدو يعطي الآخريين دروس متل ما عم يعمل أخوه الكبير … رح يطلع معنا إنو هالحكي موجه للشعب السوري أو الخونة الكلاب متل ما بسموهن المنحبكجية

طيب معقول يا سوريين؟؟؟ … معقول؟؟؟ …. معقول إنك تقدر تبرر قتل أخوك السوري وتطالب بقتل السوريين؟؟ … معقول تستمع وتنبسط بخبر عن مقتل متظاهرين يوم الجمعة؟؟؟… لك إنتو من شو معمولين؟؟ يعني هالنوع من الحقد شفتو فقط عند الإسرائيلين ضد العرب

أنا والغالبية العظمة الساحقة من المعارضة نطالب بمحاكمتو محاكمة عادلة … بس بعد هالحكي يلي عم تحكو, لا تستغربو ولا تحكو عن الإنسانية والحقد إذا انقتل ماهر الأسد واتعلق من رقبتو بالزلط وانشحط بشوارع الشام ودرعا وحماة لأنو متل ما في جحاش بالمنحبكجية في جحاش بالمعارضة!

والسؤال التاني, يا ترى إذا نفذ صبرو لماهر أفندي شو بدو يعمل؟؟ … يعني شفنا الإبداع يلي عملتو الفرقة الرابعة بدرعا وبانياس وإدلب, طبعاً كل هاد وهو لساتو صابر ؟؟

شيلو كل شي على جنب… الفرقة الرابعة مستنفرة صرلها 4 شهور بأكتر من مدينة سورية ويا ترى شو طلع معهن؟؟؟ … يعني رغم كل يلي عملو بدرعا ما قدرو يكسروهن ولساتهن بيطلعو ويتظاهرو … وطبعاً بدون ما ننسى إنو الفرقة الرابعة ما بتسترجي تروح على دير الزور لأنو كتير من الديرية عندهن أسلحة ويمكن يستخدموها, ومجند الفرقة الرابعة ما بيعرف يستقوي غير على نسوان بانياس أو على الحوراني الطيب البسيط …. وأكبر دليل على المقاومة والممانعة هي إنو الفرقة الرابعة دخلت قرية جاسم لتنكل بأهلها وهي بعيدة 40 كيلو متر على الجولان, وماهر الأسد وجماعتو مستحيل يقربو لهنيك لأنو أجبن وأضعف من إنو يروحو على الجولان, أو لأنو ماهر الأسد عندو وفاء لأصدقائو الإسرائيلين متل إيتان ابن تيسور وزير الخارجية السابق يلي التقى فيه بالأردن وبعد ما تسربت القصة غطو عليها بشكل مو طبيعي … والتاني ابن خالو مخلوف بقلك أمن إسرائيل من أمان سوريا بس المنحبكجية بطنشو عن هالحكي مدري ليش؟ … يا إما حمرنة أو جحشنة!

بس أنا بحب قول: الشعب السوري …. ويلكم إذا نفذ صبره!

حسب وجهة نظري… إلى الآن 95% من المظاهرات سلمية لأبعد حد … وال4% الباقية بيستخدم فيها المتظاهرين حجارة وعصي ضد الشبيحة يلي بيتحركشو فيهن وبيدخلو على حوايرهن … وببقي عنا 1% هي احتمال لأي شي مشان ما نكون عم نبالغ, ومشان ما يزعل تلفزيون الدنيا والفضائية السورية يمكن يكون بال1% مظاهرات بيحمل فيها كل المتظاهرين رشاشات وأر بي جي وخناجر وسيوف وشنتايات وإلذي منو

لهلأ سلمية سلمية … ولهلأ صابرين… بس هالصبر يمكن ينفذ … يعني إذا الأمن والشبيحة ما بطلو الرذالة برمضان والعيد الشعب يمكن يجن وتفقع براسو وببلش حمل السلاح ووقتها بتصير سوريا جهنم للكل بدون استثناء … وإذا المنحبكجية هلأ أخدين راحتهن بكرا إذا فقعت الجنونة رح ياكلو هوا عالمزبوط … هاد كابوس بس هالكابوس مو مستحيل … وبرجع بأكد إنو إلى الآن كل الرزالة هي من النظام!!

وفي الختام بترحم على حافظ الأسد لأنو على هالجرائم يلي عملها بحق سوريا, والدعوات اليومية ب”يلعن روحك يا حافظ” يمكن الله يعملو جهنم مخصوص إلو وللعائلة الكريمةمشاهدة المزيد


صور الحا