Arabic keyboard |
#1
|
||||
|
||||
رسالة شوق وحنين أزخينية
رسالة شوق وحنين أزخينية
"انقل الرسالة كما وردت حرفياً بدون تصرّف عن كتاب بالحرف اللاتيني، الحياة في آزخ خلف الفرمان و فِ وقت الفرمان ل عبود بيت حنا مقسي" اسنين ال بين 1930 - 1945 كانوا سنين الظلم والوَجع ، اسنين الحرب ، والهربة والهجرة من آزخ . أينا ال كايهرب من ظلم التراك صوب الجنوب ... صوب سوريا .ال وصل لَ سوريا كرتلاخ ما رَدْ لَ آزخ ، شي منن كا يترقو بناتن لَ سوريا شَ ايزوجوْوِن ، من بين هَويا البنات كا يكو وحدة اسما شموني. شموني ، من كسر كنْ سَوَتْ بيريت امّا و أبوا ال فِ آزخ ، يوم الويحد راحت لَ سّوق وأخزتلا ورقة مكتوب ودارت عل ويحد فِ ديركه شَ يكتبلا مكتوب ، شموني اشقد ال دارت ماأرت وما پَيَّدت ويحد تِ تي تيق يكتبلا مكتوب ، شموني انجبرت راحت عند كاهن ديركه ال كا اسمو قس كبرو (الله يرحمه) . شموني اتْلَعَّتْ فل كاهن شَ يكتبلا مكتوب واتَّرّقو شَ آزخ شَ امّا وأبوا . القس قالّا: بنتي أنا أشطوف تكتبلكي مكتوب فل أزخيني ؟ موعرف ؟! شموني افتكرت شويّة وقالت شَ القس: أبونا ، أنا تقولّك وانتا تتكتب ، انْتَينتن اتفقو ف هازا الفكر. شموني بَدَت اتْقُلْ وقس كبرو بَدا يكتب . من ديركه مكتوب الى آزخ يا أمي أنا بنتكي شموني من ديركه ، هازا المكتوب ف قلم قس كبرو كَكْتبلكي ، اليوم كن نحنى ف شهر تشرين الخَلْفيني وكما الْ كي قولون هازيه سنة ال 1940ني . يا أمي ما بقا أري غير خيالاتكي ، أسلّم عليكي و أمَرْچق فلْ بَوْسات هَوْك إيديكي و كو سيتو بوش بوش بيريتكي وبيريت هَوْك أخُوْتي و خُوزِّي ف وقت ال كا أحمل وأحط هاك أخوي عَنّونو عل قَرَپچّتي ، أدوّرو و أروح إلى بيت خالتي ، و أيش كي سى أبوي ؟ كو شتقتولو ف وقت ال كا ألقّط عدس خلفو و هوِّ خلف لِ صوار كا يسوق فدّان وكا يغنّي ! آخ يا أمي هاك الزباله منِ امبدالكي من الاسطبل نَقَلا و كوَّما ؟ ومنِ عَجَّق مَجيبل السرقين و كَرّسا ؟ وكم دزْيه جَلّه سيتي و بَنَيْتي منّا ؟ خوزّي ف چاخ ل أنا وانتي كا نغربل هاك الحنطة ! أمي أبونا القس كو تْفَلّشْ فل قلم. كرْتْلَخْ أسلم عليكي وعل أبوي و أخوْتي ، الله يخليكي سلمي على جيرانينّا و بوش كو اشتقتو ف وقت ال كا نسى سَلّكات مع بعظ قدّام ال ابواب فل اسقاق ، من خَرْج وقَصِلْ حنطة الاسترالي ف الحنك وف الفرحة. و هوِّى ( يعني زوجي ) كو صار عسكر فرنساوي و كو بقينا أنا و حَميتي ف البيت كو نسى " بو بو بارستان حَوْشه حَوْشه دولابى " مع بعظ . وكرتْلَخ أسلم عليكن وعل ايستمع عل قراية هازا المكتوب ال تَشَيّعو مع القَچاغْچية ف ألف صعبة و صعوبات . و أبوس هَوْك إيدَيْكن و بخاطركن . ديركه 15 - 11- 1940 |
مواقع النشر (المفضلة) |
|
|